26 June 2012

روتين صباحى

فى نظر ناس كتير و يمكن أنا كنت زيهم كده مقتنع بأن القاهره أحلى ما فيها ليلها .. التمشيه اللذيذه على الكورنيش و الفسحه الحلوه فى  وسط البلد والأيس كريم من عند قويدر و حفله 9 فى سينما مترو..

القاهره دايما مبتحلوش فى عين الناس غير بالليل .. رغم ان الدوشه هى نفسها الدوشه بتاعة الصبح بس بنسمعها و كأنها مزيكا و الزحمه هى الزحمه بس بتبقى فى نظرنا لوحه فنيه .. بالنسبه ليا انا بقى القاهره مفيش أحلى منها ساعة الفجريه ..

أحلى حاجه فى الفجريه عربية الفول .. يا سلام حدثنى يا معلم عن عربية الفول ..بالقرب من المدينه الجامعيه حيث أسكن مؤقتا .. فاضل بس أسبوعين أخلص المشروع و أمشى .. فيه واحد إسمه عم جمال ... عم جمال بيعمل أحسن فول ممكن تاكله فى حياتك ... أنا اصلا مبحبش الفول بس الراجل ده بصراحه لا يقاوم .. عنده فى الشغل مفيش هزار .. مواعيده مظبوطه .. لو بتاع العيش إتأخر عليه شويه تبقى دى أخر مره يتعامل فيها معاه... عم جمال بيعمل سندويتش الفول بنص جنيه ... بقوله يا عم جمال الناس كلها بتبيعه دلوقتى ب 75 قرش إشمعنا إنت ؟؟ يقولى يا أستاذ و الغلابه تاكل إزاى .. قلتله  طب و إنت كده تكسب ازاى .. بصلى بعنيه المقفوله تقريبا من ضعف نظر يقترب من العمى و باس إيده وش و ضهر و قالى مستوره و الحمد لله يا أستاذ ... هو الوحيد اللى إدانى درجة الأستاذيه مع انه هو اللى أستاذ ..

بعد أكلة الفول التمام مفيش أحلى من فنجان قهوه زياده على قهوه إسمها الواحه لزوم الفوقان ...  مع سيجاره لزوم هضم الفول .. و كده يبقى أنا إبتديت صباح يوم جديد مفيش أحلى منه و نهارك أبيض يا أستاذ على رأى عم جمال 


4 comments:

  1. ااااااااااااااااالله عليك يا عم جمال :):) رااااجل زى العسل هم دووول المصرييييين بحس اوووى فى المصريين فىناس اللى زى عم جمال :):) بس أنا بحب القاهره صبح فى صوت أم كلثوم و نسمه صباح يا معطره جناح :)

    ReplyDelete
    Replies
    1. الكومنت بتاعك أجمل من الموضوع نفسه .. شكرا على المرور

      Delete
  2. حلو اوي ده .. وانا حبيت عم جمال :)

    ReplyDelete
    Replies
    1. فاضل بس تجربى الفول بتاعه .. و انا عازمك .. :D

      Delete