24 May 2013

تيجى نتحرش

تخيل الموقف ده .. 
تخيل انك واقف مع صاحبك  و عدت واحده ست كبيره شويه فى السن و جميله 

هو : الواحد بقاله فتره "شرقان" اوى
إنت : من كتر الفرجه على أفلام السيكو سيكو ( ههههه )
هو : هو انا نفسى اتقطع من شويه ( هههه )
إنت : شفت المره الشمورد  اللى ماشيه هناك دى .. تيجى نروح نعاكسها
هو: دى امى يا إبن (*&^%%*)

الموقف دا حصل قدام عينى بين اتنين صحاب سنهم ميزيدش عن 15 سنه ( أطفال ) ماسكين كراريسهم داخل أحد محطات المترو ..
 ازاى وصلنا للحال ده ..إزاى وصل أطفالنا انهم بقو متحرشين بالفطره .. مش هو ده الشعب الللى متدين بطبعه .. ازاى شوية عيال لسه مطلعوش من البيضه يعملو كده و يقولو كده ..  بدون أى خجل من الللى حواليهم .. بدون اى خوف من ربنا او اعتبار لعرف او دين
ازاى تبقى واقف فى المترو و هو زحمه شويه و انت عمرك متتوقعش ابدا ان اللمسه اللى انت شايفها بعينك دى و اللى متقدرش تعملها مع واحده ست ممكن تكون فى سن والدتك او اللفظ البذىء اللى طالع بكل قوه و جرأه ده من عيل لسه مكملش ال 18 سنه .. إزاى يا بشر

العيب فين
العيب فى مين
و ازاى اى بنى ادم يرفض الغلط فى حقه و يقبله فى حق الناس

بقولك ايه يا عم المتحرش  ما تيجى نتحرش ! و أهو تحرش بتحرش بقى !

عزيزى المتحرش ما تيجى نتحرش بأم سيادتك
عارف ليه علشان ام سيادتك هى اللى مش ربتك ان الست دى كيان و لازم تحترمه

عزيزى المتحرش ما تيجى نلمس جسم ام سيادتك
علشان امك دى مش عودتك ان جسم المرأه ملكها مش ملك اى واحد زباله ماشى فى الشارع

عزيزى المتحرش ما تيجى نقول لأم سيادتك  كلامى قبيح
علشان امك مش هددتك انها تقطع لسانك او تكويه بالنار لو حضرتك من و انت صغير ما اتعلمتش تحافظ عليه

للأسف المشكله بدايتها برضو من عند الست اللى مش ربت ابنها
و من عند الأب اللى مش خايف على مراته و بنته فمرباش ابنه
المشكله بدايتها من الأم و الأب من البيت
و الأم بالذات لأن المرأه هى أول المتضررين و هى اول المالكين للحل

الأم مرسة إذا أعددتها أعددت شعبا طيب الأعراق

لازم كل ام تراجع نفسها فى تربية إبنها
ليه منعملش مجموعات تبقى مثلا أمهات ضد التحرش
ليه ميكونش عندنا مبادىء تربيه و علم نفس و تعليم للصغار بقيمة المرأه و التنفير من التحرش و نعلم الحاجات دى للأمهات يربوا اولادهم عليها


ليه منبدأش بالأم


شكر خاص للكاتبه رشا أبو السعود
هى ألهمتنى كتابة الموضوع ده
و انفس شويه عن غضبى كراجل
خايف على اخته و امه و الستات المحترمه زى الاستاذه رشا

و دى الاستيتس الجميله اللى خلتنى اكتب الكلمتين دول

https://www.facebook.com/AuthorRashaAboElsoud/posts/658122547547310

01 May 2013

تايه



تايه فى بحر الغرام
أديلى اربعين سنه
لا لقيت شط او مرسى
أو ساعة هَنا
لا عرفت مين حبيبى
و لا عرف حبيبى مين أنا
أبكى
و اخاف دموعى تعمل طوفان
و مين هيغرقه الطوفان 
غيرى أنا
مش مصبرنى ع التوهان
اللى طال غير موال
 و حبة غُنا

06 March 2013

برد و لفافة تبغ



ليلة من ليالى البرد
و لفافة تبغٍ
تطلق دخانا أبيض
... كأحلامى
و فنجان قهوة
من صنع أمى
مرسوم على وجهه
الماضى و القادم
من أيامى
مطفأة سجائر تتوسد
قصاصات ورق
محبرةٌ بألامى
و قمر أفلٌ يختبئ
بين موجات الغمام
.....
يمينى تحتضن قلماً
بلا حبرٍ
يرسم فى الهواء
حَبراً يطارد حلماً
و يرسم
غراب غربتى
يطارد
فى سماء وحدتى
سربا من يمام
و بقايا إنسانٌ
كان فى الماضى أنا
يرقد هنا
فى قبر بلا شاهد
و بلا سلام
و أمام القبر إمرأة
تتشح سوادا
تبكى من ذات قلبٍ
لطالما خان غرامى
....
يا إمرأة تتشح السواد لا تبكى
فبرغم فراقك
لا يحتمل قلمى رسم دموعك
فويل لأقلامى
يا إمرأة لك وجه
الخيانة
و الموت
و النشوى
و الوقت
اتركى الخنجر من يدك
حتى لا يطالك الإتهام
بقتل هيامى
و إرحلى
من أمام قبرى
فقد يشهد شاهده الصامت
انك قسمتى الى نصفين
قلبى البدر
فى وقت التمام
إرحلى
و اتركى لى البرد
و لفافة التبغ
و بقايا أقلامى

04 March 2013

صوتك



برغم كل الضجيج حولى
غارق انا فى الصمت
قلبى ينبض بالحياة
لكن تحوطه ظلمة الموت
وحيد برغم الذكرى الأخيره
التى تصرخ
لتعيد الى النبض
ذكرى الصوت
صوتك حبيبتى
مبعوثا فى قلبى
كقبلة حياة
تحيينى بقتل الوقت
صوتك حبيبتى
قنديلى
فى وجه ظلمات الليل
مركبى
وحده يعبر الموج
نقطة ماء
لن تختلط ابدا بالزيت
صوتك
وحده يمكنه قتل الموت

10 February 2013

تقوب

توبى مليان تقوب
و مظلتى طيرها الهوا
قبل المطر بثانيتين يدوب
و اتدارت جوه البيوت كل العيوب
بعيونها تراقبنى
و تحاسبنى و كأن التقوب ذنوب