25 November 2012

 أحب أقول لصاحبى المخدوع
مفيش حب ع النت يا صاحبى
الحب بيبقى وجها لوجه
 
 
الحب يلزمه  ....  اللقا و التلاقى  ♥

20 November 2012

قراءه فى رواية (يوسف زيدان) - ظل الأفعى

صدق كل من قال ان يوسف زيدان لم يكتب إلا عزازيل .. فما كتبه بعدها لم يرقى أبدا لمستواها .. يوسف زيدان اللاعب على أوتار الشك حاول هذه المره تقديم روايه فى قالب غير روائى على الإطلاق فجائت روايته الصغيرة الحجم منقسمه على نفسها إلى قسمين .. القسم الاول هو حكايه الإبنه و الزوج و الجد .. و القسم الثانى و هو رسائل الأم الى الإبنه

لذلك فسأتناول الروايه على قسمين مجبرا .. فأما القسم الأول فلم ينقذه من السقوط المدو إلا فصاحة يوسف زيدا و حسن أسلوبه و تناوله أما القصة فى حد ذاتها فلا تتعد كونها إشتهاء زوج لزوجته جنسيا مع بعض الحبكه الدراميه غير المتقنه
و لاحظت فى هذا القسم إستخدام يوسف زيدان للحوار العامى فى الحديث بين الشخصيات و هو ما غاب عن روايتيه عزازيل و النبطى بطبيعة الفرق بينهما و بين ظل الأفعى التى تدور أحداثها فى العام 2020

أما القسم الثانى و هو الاجمل و هو الخارج عن إطار الروايه إلا إطار أخر لم أفهم كنيته و لم أستسيغ علاقته بالروايه  فهو قسم رسائل الأم إلى إبنتها .. و هى تحكى عن الألهه الإناث فى العصور القديمه و عن التمييز بين المرأه و الرجل و تاريخ ظهور هذا الفارق و من هذا القسم سأقتبس بعض العبارات التى أشد ما أعجبتنى فى الرواية و هى 


-و كانت لغة الناس من التبجح بحيث إستعارت لمسيرة الجيوش وصف الزحف المأخوذ من حركة الأفعى. الناس يا إبنتى لم يعرفوا أن الأفعى أكثر حكمة من تلك الجيوش التى لا عقل لها, تلك الجيوش التى تعمل دوما بأمر من خارجها, أمر يأتى ممن يسمونه القائد. و القواد قواد يا إبنتى. إنهم الرجال الفراغ الذين يؤججون حروب العالم و إن لم يجدوا الحرب أشعلوها ليواجهوا خرابهم الداخلى بتخريب العالم.

-و لسوف تدركين أن روح اللغة العربيه صار اليوم مشوشا. فإذا صح أن اللغة ترسم العالم فى أذهان المتحدثين بها .. فإن الناس فى بلادك مشوشون.

-لا فائدة من من كلام لا يسمع و من وعى بلغ من التخلف ان اعتقد بإحاطته باليقين التام و بأن كل ما يقع خارج معتقده إنما هو ضلال مبين.

19 November 2012

فى ذكرى محمد محمود

عمرى ما هنسى اليوم ده .. من سنه فاتت .. كنت لسه أيامها طالب و قاعد مأنتخ فى المدينه .. و صاحبى يتصل عليا يقولى تعالى ضرورى .. كنا حوالى الساعه 11 بالليل و الدنيا برد و انا قاعد مستغطى و دفيان و مش دارى باللى بيحصل فى محمد محمود
رحت لصاحبى لقيته نايم ع السرير

بنطلونه غرقان دم علشان .. (الحمد لله) .. الرصاصه صابت رجله بس !!!
طبعا المنظر مفجع بس ده ييجى إيه فى اللى عينه طارت و اللى مات

عمرى ما هنسى انى كنت جبان علشان
أنا منزلتش محمد محمود 
ندمـــــــــــــان
و انى كنت غبى علشا مفهمتش لعبة الإخوان و العسكر و الإعلام ضحك عليا و علشان كده
منزلتش محمد محمود
ندمـــــــــــــان

لكل اللى نزل ... إنت أحسن منى و من الإخوان و من أى حد باع دمك بالرخيص
الحاجه الوحيده اللى ممكن أكفر بيها عن ذنبى
هى إنى و بعلو صوتى هقول يا نجيب حقهم يا نموت زيهم
دم صاحبى المفروض ميضيعش هدر
 حق اللى ماتوا فى محمد محمود لازم يرجع
المسئول لازم يتحاسب

**********
الثوره على الحيط مرسومه جرافيتى
متلونه بالدم
دم شهيد متدهب بدمع أم
*********
 ******************

18 November 2012

خرجوا و مش راجعين

دى تالت مره أحاول أكتب عن اللى حصل النهارده .. بس كل مره بعد ما أكتب امسح اللى كتبته بسبب كمية الشتايم اللى غصب عنى بلاقينى بكتبها .. مش علشان الشتيمه حرام .. لا.. بس مينفعش أجى أكتب عن أرواح طاهره زى أطفال أسيوط و يقترن بكلامى شتيمه .. برغم إنى مقتنع تماما إن الشتيمه مبرره فى كل المسؤولين عن المصيبه دى .


من ساعة ما سمعت الخبر و شفت بعينى الصور و انا مش قادر أتمالك نفسى .. بحط نفسى مكان أهلهم .. أنا مش متخيل لو واحد منهم كان أخويا كنت هعمل ايه .. لا واللى قتلنى لما سمعت قيمة التعويض .. يعنى ايه الطفل تعويضه 4000 جنيه يعنى الحادثه كلها واقفه ع الحكومه ب ربع مليون جنيه فى 50 طفل 

طب بالزمه كده ليا حق اشتم و لا لاء ؟؟

أنا مخنوق مش عايز أكتب
 الحاجه الوحيده اللى مصبرانى انى عارف انهم بكره هيحضروا الحصه الأولى فى الجنه
و إحنا هنكمل عايشين و دمهم فى رقبتنا

كلمه أخيره

اللى حصل النهارده بسبب ان  إحنا مجبناش حق شهداء الثوره و ضيعنا حق شهداء مع بعد الثوره فى ماسبيرو و محمد محمود 
بالعدل تقوم الأمه


04 November 2012

رواية الفيل الأزرق - أحمد مراد

حاسس ان انا منتشى بشكل فظيع .. مع خضه و شوية رعب .. ببساطه لأنى لسه خارج من رواية رعب .. خارج منها لأنى فعلا كنت عايشها .. و هى ده اللى بيعمله أحمد مراد .. بيعيشك الحكايه بتاعته .. بيخليك انت بطلها .. أنا قريت رواياته التلاته و افتخر .. فيرتيجو و تراب الماس و أخير و ان شاء الله ميكونش أخرا رواية الفيل الأزرق .. برغم جو الخيال و العفاريت و الجن و شغل الشعوذه اللى انا مبقتنعش بيه اوى بس انا بقرأ الروايه و انا حاسس بخوف .. بضحك على إيفهات مراد الجامده اللى بتخطفك وسط جو الحماسه اللى هو معيشك فيه . بيسكرك بكمية خمره و حشيش مغربى رهيبه ماليه الروايه .. يعنى هتكيف هتتكيف
:D