كلنا يـد واحده

مسلم مسيحى ليبرالى إخوانى سلفى كلنا إيد واحده

هل أحداث مارس 1954 تتكرر ؟؟

هل أحداث مارس تتكرر ؟؟

فى مارس 1954 تم تنحية محمد نجيب عن السلطه نهائيا
 

***** لــــــــــــيـــه ؟؟؟ *****
- محمد نجيب كان عايز يرجع الأحزاب .. يرجع البرلمان .. يعمل ديموقراطيه
- عبد الناصر كان عايز حكم الثوره ( او بمعنى أصح مجلس قيادة الثوره يستمر )

- الشعب كان فى أغلبيته واقف مع نجيب و خصوصا أهل السودان
أيام ما كان فيه وحده بين مصر و السودان

***** يعمل إيه عبد الناصر و مجلس الثوره ؟؟؟ *****
- أعلنوا عودة الأحزاب و البرلمان

( زى ما تقول كده بيعملوا فخ لنجيب و هو وقع فيه (
- تحالف عبد الناصر مع الإخوان لكى يضمنهم فى صفه

ضد بقية الأحزاب المصريه و التيارات السياسيه
- شجع عبد الناصر و رفاقه إضراب العمال المصريين

عن طريق إستخدام نقيب العمال فى ذلك الوقت
- خرجت أغرب مظاهرات فى التاريخ تنادى بسقوط الديموقراطيه 

كان الهتاف ( تسقط الديموقراطيه - تسقط الحريه ) ..

تخيلوا شعب بيهتف تسقط الحريه !!!!!!
- الصحف اللى تبع مجلس الثوره شوهت صورة نجيب

و قالت انه بيتصل بحزب الوفد ( على أساس الوفد دول صهاينه مثلا )

و برغم إن الوفد كان ايامها هو حزب الأغلبيه قبل الثوره

بس طبعا تم تشويه صورته و إتقال انه كان حزب الملك !!!!!!!
- و بعدين إعتقلو محمد نجيب و بدأ حكم العسكر لمصر ....

و لسه مستمر حتى الأن

- كان تحالف الإخوان مع عبد الناصر و بإعترافهم أكبر خطأ إرتكبته الجماعه لأن بعدها بفتره بسيطه حصلت حادثة إغتيال ( مسرحيه ) و اتهمو الإخوان انهم حاولو قتل عبد الناصر و ده محصلش نهائيا و طبعا الإخوان فضلوا بيتبهدلوا و بيطلع عينهم منذ هذه اللحظه
- تم إلغاء الأحزاب و لم تعد إلا فى عهد السادات و تم إلغاء الديموقراطيه و تقييد الحريات ...

***** هل تتكرر أحداث مارس ؟؟ *****

بعد اللى حصل الليله فى بورسعيد

 
بدأنا نسمع ناس بتطالب بعودة قانون الطوارىء اللى المجلس العسكرى ألغاه زى ما مجلس الثوره رجع الأحزاب و رجع البرلمان ...
هل هو طُعم برضو ... و هل الإخوان هيقعو فى نفس الخطأ و لا واخدين بالهم المره دى ..

الكلام اللى أنا كاتبه عن أحداث مارس 1954 حقائق تاريخيه و اللى عايز يتأكد منها هيلاقيها ماليه النت و كتب التاريخ ...
و بقية الكلام عن المجلس العسكرى هو رأى شخصى يمكن أكون مخطىء فيه او مصيب .. مجرد رأى ...

إغتيالات

حدث من حوالى 20 عام .. إغتيال لمفكر مصرى إسمه فرج فوده ..

الإغتيال حدث على يد أشخاص تابعين للجماعه الإسلاميه 

بعد فتوى (تكفير)

 من ( شيوخ ) جماعة الجهاد ( عمر عبد الرحمن و محمد الغزالى )

الجماعه الإسلاميه دى ( هى برضو المسئوله عن إغتيال السادات

 و غيره كتير من المفكرين و السياسيين

 و عمليات إرهابيه و تفجيرات فى مختلف أنحاء مصر )

بعد الثوره الجماعه الإسلاميه عملت حزب إسمه حزب البناء و التنميه حصل على 13 مقعد بالتمام و الكمال فى مجلس الشعب لأنهم ببساطه كانو مترشحين على قوائم حزب النور ..

أنا قصدى إيه من الكلام اللى أنا كاتبه فوق ده .. مش قصدى حاجه .. إنت بس شوف دى :

سئل قاتل فرج فودة اثناء محاكمته :
ـــ لماذا اغتلت فرج فودة ؟
القاتل ـــ لانه كافر.
ـــ ومن أي من كتبه عرفت انه كافر ؟
القاتل ــ انا لم أقرا كتبه.
ـــ كيف ؟
القاتل ـــ انا لا أقرا ولا اكتب !!

حد فهم حاجه ؟؟؟!!!!

ماما زوزا

ماما زوزا
ست عندها أكتر من 80 سنه
إتسندت على عكازها و على إيده لحد ما وصلت للميكرفون
نزل الميكرفون لمستوى طولها اللى ميزيدش عن متر و نص

بسبب إنحاء الضهر بحكم السن
إبتسمت و بدأت تغنى يا حسن يا خولى الجنينه قدام أكتر من 100 واحد
أنا كنت من ضمنهم
هى متعرفنيش
و أنا معرفهاش
طبعا أول خاطر جه فى بالى هو حكم بأنها و بكل تأكيد
ست كبيره و بتخرف
تروح تدور على قبر يلمها أحسن


و بعدين فكرت شويه
عملت مقارنه بينى وبينها
بين شاب لسه عنده 21 سنه و هى عدت ال 80
سألت نفسى إمتى أخر مره عملت حاجه بتحبها ؟؟؟؟
إمتى أخر مره عملت حاجه من غير ما تهتم برأى الناس ؟؟؟؟
إمتى أخر مره كنت نفسك ؟؟؟؟
فعلا هى كبيره فى السن
فعلا هى واقفه على عكاز
فعلا هى مش مكسوفه من الناس
مش هاممها الناس
بتضحك و بتتحدى الناس
بتتحدى السن و العجز
مش خايفه من بكره
و بتغنى
بتعمل حاجه هى بتحبها

شكرا لإمرأة لا تعرفنى لكنها علمتنى درسا لن أنساه