25 January 2012

يــنــــــــ 25 ـــايـر

كنا مش حاسين بقيمه .. و الأمل موضه قديمه



09 January 2012

رحله

ضحكة المساجين

ياعم أقعُد بس وإشرب شاي
الدنيا ماشية وشعبنا نساي
والبركة في الشاشة وفي الجرانين
وإذا (هوهوو) قوم إعلن الأحكام
وكل بُق تلجمه بلجام
ومش هتغلب تطبخ القوانين


 


ومصر عارفة وشايفة وبتصبر
لكنها في خطفة زمن تعبر
ومصر عارفة وشايفة وبتصبر
لكنها في خطفة زمن تعبر
وتسترد الإسم والعناوين

03 January 2012

حد عايز قلب فاضى

حد عايز قلب فاضى
قلب طيب..قلب هادى؟
قلب كله حنان وعطف
يخطفك من الحزن خطف
مستعد يحب حتى
قلب عايز ينسى ماضى 



هى نظره من الشباك

هى نظره من الشباك



بفضل واقف تحت بيتك بالساعات
مستنيكى تطلى من الشباك
و تاخدنى الخيالات
أسرح فى أول مره شفتك
فى إبتسامة الخجل على شفايفك
من كتر ما طولت النظر
و تبصى ف الأرض من الكسوف
ساعتها غيرت من الحجر
إشمعنا هو اللى يشوف
و يطول ف النظر
و يومها كتبت أول رساله
مش بالحروف
كانت مناجاه للقمر
غار القمر من حبى ليكى
ضحك عليا و قالى خليها بكره
الليله فيه خسوف
و أتاريه رايح يلم النجوم
و يرصهم صفوف
لأجل يغازلك حبيبتى
بس إنتى كنتى نمتى
و أنا اللى سهرت ليلتى
و قضيت ساعات
واخدانى الخيالات

جربت اقول لأه



جربت اقول لأه
لحبك مقدرتش
و لسانى لو قالها
قلبى يعاندنى
مع كل دقه
و يقولى محرمتش
و رجعت شربت من كاسها حتى ارتويت
و لا سكرتش
طب ما انت جربت كل شئ
جربت الزهد و سكنت محراب
و لفيت الصحرا و لقيت
نسيانها سراب
و قلت هحب غيرها
و غيرها بيتمنو
هيسمعو الشعر من فمى
يدوخو و ينامو فى حضنى
يتهنو
و بعد كل ليله من دول
تبكى خيانتك
ما اصل الحب ليه اصول
و القلب ميساعش
غير حبيب واحد
هو اللى تسكن محرابه
و ف ليله تكون ساهد
تصلى و تعاهد
ما تنسى و لا يوم
تجرب تقول لأ

ايه يجيب الزعل



ايه يجيب الزعل
حبينا بعض يومين و افترقنا
و لا انت فاكره الغرام سرقنا
اطردى من بالك دى فكره
و بلاش زعل
دا حبنا كان مفتعل
و لا انت صدقتينى
لما كدبت و قلت
انك لعينى الضى
انك اللى فات من عمرى
و اللى جاى
و انى لفيت الكون
فى ساعة جنون
يمكن الاقى زيك
و ملقتلكيش زى
اوعى تصدقى
ان قلبى فى يوم
بنار حبك اشتعل
دا حبنا كان مفتعل
يبقى ليه الزعل
قلتيلى حبيت قبلك
و انا مغيرتش
عرفت كام قبلى مسكو يدك
و لا غيرتش
و مااستغربتش
اصلك انت برضو مش اول ايد بامسكها
و لا اول شفايف بوشوشها
و لا اول واحده بلمسها
و لاجل ماالمسها بقولها انى عاشقها
و لما ليل العشق يكتمل
اعرف و اعترف ان الحب ده كان مفتعل
طب ليه الزعل
و ايه يجيب الزعل
عايزه نفضل مع بعض كمان يومين
مفيش مشاكل بس نبقى متفقين
انى عمرى فى يوم ما هحبك
اصل الحب لو مجاش من اول نظره
يبقى يا حسره
مش حب
دا واحده بس هى اللى ممكن تسكن القلب
فحبينى زى ما تحبى
و نامى فى حضنى على قد ما تحبى
و خليكى جنبى
بس لما نفترق
اعرفى ان ده مش ذنبى
ده على رأى المثل
ان كان حبيبك عسل
....
يبقى ليه الزعل