محاوله اخيره لفهم نفسى

عمرى فى حياتى ما كنت اتخيل انى معقد للدرجه دى .. عايز أفهم نفسى علشان اقدر اعيش و اتعايش معاها و بيتهيألى ان دى هى فرصتى الأخيره .. لأن كل يوم بكتشف فى نفسى حاجات بتفاجأنى و بتضايقنى ... عايز أكون نفسى بس مش عارف .. عايز استمتع بالحياه و الحب و الفرح و مش عارف ... عايز اغضب و احزن و انفعل و ابكى دموع حقيقيه برضو مش عارف ...

أنا مين ؟؟؟؟!!!

السؤال ده بيتردد فى ذهنى كل يوم .. مع كل موقف بقابله و أتصرف فيه بطريقه بتفاجئنى .. و دايما الإجابه بتتوه منى و يتوه معاها السؤال و انسى السؤال و اضيع من نفسى الإجابه .. بس مش المره دى .. لازم اعرف نفسى و اعرف انا مين و عايز ايه و ليه .. يمكن خوفى من انى اعرف حقيقة نفسى بيخلينى اهرب من الاجابه على السؤال ده .. يمكن خايف اكره نفسى .. اكره نفسى لما اكتشف انى كذاب و مخادع .. و مش بس كذاب لا و كمان بحب الكذب و يمكن كمان بشعر بنشوه رهيبه لما اكدب .. بحس انى منتصر .. انى ذكى .. انى اقدر اخدع اى حد  و انى اذكى من اى حد .. بيتهيألى مفيش حد قابلته فى حياتى كلها و مكدبتش عليه .. ايه االلى بيخلينى اكدب و احب الكدب .. يمكن بكدب علشان اهرب من حقيقة نفسى .. يمكن لإثبات ذكائى او علشان اخبى ضعفى يمكن بنكر واقع ان حياتى ملهاش طعم ولا لون فبلونها بالكدب .. بكدب و اقول بحبك و اكدب و اقول انا كويس و محترم و اكدب بطريقة كلامى بتصنعى الابتسامه فى وجه اشخاص اكرههم حتى قبل ان القاهم .. و اكدب فى اخفاء حبى الحقيقى و التشويش عليه .. بس الكدبه الأخيره دى بكدبها على نفسى ..

ياااااااااه .. كم مره كدبت فيها على نفسى و خبيت حبى و اظهرت مكانه الكره .. كم مره خدودى تحمر من الخجل بمجرد انها تبصلى و انا ابصلها و برغم كده اول ما احاول اقربلها و تقربلى ابعدها عنى بقسوه و اعذبها و اعذب نفسى .. و ان كنت احتمل عذاب نفسى فكيف يا ربى أحتمل عذابها .. يا ربى كيف أكذب ؟؟؟

كذبتى الكبيره التى اعيش فيها يوما ما ستقتلنى ....

عبد الناصر الذى ككل شىئ فى مصر

كم أحب عبد الناصر .. نعم لم أعاصره .. و نعم قرأت عشرات الكتب و سمعت مليون مره عن ظلمة سياساته و عن قمعه للمعارضين لكنى أحبه .. يكفى أنت تسمع خطابا واحدا له لتسقط فى بحر عشق عبد الناصر .. كلماته القويه .. و عباراته المصريه .. و نبرته العربيه .. كلها تأثرك و تثتأثر بكيانك .. فقط .. لأنها صادقه 

ربما ظلم عبد الناصر او قسى .. ربما أخطأ .. لكنه دوما سيظل الأصدق .. أحرص من حكم مصر على مصر .. و أكثر العرب رفعا لراية العروبه

نعم أحب عبد الناصر برغم تناقضاته .. برغم الجدل حوله .. لأنه ككل شىء فى مصر .. برغم كل السىئ فيها .. تحبها

سيظل عبد الناصر زعيما .. للعرب .. و للقلوب المشتاقه لنصر العروبه

 ..

فى ذكرى ميلادك أسأل 

الله لك الرحمة و المغفره ♥

 

ايه الجديد

مفيش جدبد .. عدت سنه و جت سنه .. و برضو مفيش جديد

و أنا أصل مش منتظر يكون فيه جديد

يمكن 2012 كان فيها الحلو زياده عن المر .. يمكن بالنسبه ليا كانت مليانه أحداث بس برضه لسه كتير أوى كان نفسى أحققه و محققتوش ..

بجد مفيش أى سبب يخلينى أقول ان 2013 هتكون أحسن أبدا من 2012 و خصوصا انى رايح الجيش و ما أدراك ما الجيش

مفيش حد يسلفنى شوية تفاؤل!!!

 أحب أقول لصاحبى المخدوع

مفيش حب ع النت يا صاحبى

الحب بيبقى وجها لوجه

 

 

الحب يلزمه  ....  اللقا و التلاقى  ♥

قراءه فى رواية (يوسف زيدان) - ظل الأفعى

صدق كل من قال ان يوسف زيدان لم يكتب إلا عزازيل .. فما كتبه بعدها لم يرقى أبدا لمستواها .. يوسف زيدان اللاعب على أوتار الشك حاول هذه المره تقديم روايه فى قالب غير روائى على الإطلاق فجائت روايته الصغيرة الحجم منقسمه على نفسها إلى قسمين .. القسم الاول هو حكايه الإبنه و الزوج و الجد .. و القسم الثانى و هو رسائل الأم الى الإبنه

لذلك فسأتناول الروايه على قسمين مجبرا .. فأما القسم الأول فلم ينقذه من السقوط المدو إلا فصاحة يوسف زيدا و حسن أسلوبه و تناوله أما القصة فى حد ذاتها فلا تتعد كونها إشتهاء زوج لزوجته جنسيا مع بعض الحبكه الدراميه غير المتقنه

و لاحظت فى هذا القسم إستخدام يوسف زيدان للحوار العامى فى الحديث بين الشخصيات و هو ما غاب عن روايتيه عزازيل و النبطى بطبيعة الفرق بينهما و بين ظل الأفعى التى تدور أحداثها فى العام 2020

أما القسم الثانى و هو الاجمل و هو الخارج عن إطار الروايه إلا إطار أخر لم أفهم كنيته و لم أستسيغ علاقته بالروايه  فهو قسم رسائل الأم إلى إبنتها .. و هى تحكى عن الألهه الإناث فى العصور القديمه و عن التمييز بين المرأه و الرجل و تاريخ ظهور هذا الفارق و من هذا القسم سأقتبس بعض العبارات التى أشد ما أعجبتنى فى الرواية و هى 

-و كانت لغة الناس من التبجح بحيث إستعارت لمسيرة الجيوش وصف الزحف المأخوذ من حركة الأفعى. الناس يا إبنتى لم يعرفوا أن الأفعى أكثر حكمة من تلك الجيوش التى لا عقل لها, تلك الجيوش التى تعمل دوما بأمر من خارجها, أمر يأتى ممن يسمونه القائد. و القواد قواد يا إبنتى. إنهم الرجال الفراغ الذين يؤججون حروب العالم و إن لم يجدوا الحرب أشعلوها ليواجهوا خرابهم الداخلى بتخريب العالم.

-و لسوف تدركين أن روح اللغة العربيه صار اليوم مشوشا. فإذا صح أن اللغة ترسم العالم فى أذهان المتحدثين بها .. فإن الناس فى بلادك مشوشون.

-لا فائدة من من كلام لا يسمع و من وعى بلغ من التخلف ان اعتقد بإحاطته باليقين التام و بأن كل ما يقع خارج معتقده إنما هو ضلال مبين.

فى ذكرى محمد محمود

عمرى ما هنسى اليوم ده .. من سنه فاتت .. كنت لسه أيامها طالب و قاعد مأنتخ فى المدينه .. و صاحبى يتصل عليا يقولى تعالى ضرورى .. كنا حوالى الساعه 11 بالليل و الدنيا برد و انا قاعد مستغطى و دفيان و مش دارى باللى بيحصل فى محمد محمود

رحت لصاحبى لقيته نايم ع السرير

بنطلونه غرقان دم علشان .. (الحمد لله) .. الرصاصه صابت رجله بس !!!

طبعا المنظر مفجع بس ده ييجى إيه فى اللى عينه طارت و اللى مات

عمرى ما هنسى انى كنت جبان علشان

أنا منزلتش محمد محمود 

ندمـــــــــــــان

و انى كنت غبى علشا مفهمتش لعبة الإخوان و العسكر و الإعلام ضحك عليا و علشان كده

منزلتش محمد محمود

ندمـــــــــــــان

لكل اللى نزل ... إنت أحسن منى و من الإخوان و من أى حد باع دمك بالرخيص

الحاجه الوحيده اللى ممكن أكفر بيها عن ذنبى

هى إنى و بعلو صوتى هقول يا نجيب حقهم يا نموت زيهم

دم صاحبى المفروض ميضيعش هدر

 حق اللى ماتوا فى محمد محمود لازم يرجع

المسئول لازم يتحاسب

**********

الثوره على الحيط مرسومه جرافيتى
متلونه بالدم
دم شهيد متدهب بدمع أم

*********

 ******************